Skyldur hjá Almannaverkinum

Almannaverkið er ein myndugleiki, ið hevur rætt og skyldu at taka avgerðir í samsvari við almannalóggávuna. Viðgerð av málum skal eisini fylgja ávísum krøvum, sum fyrisitingarlógin fyriskrivar.

 

Starvsfólkini

Á deildunum arbeiða starvsfólk, ið eru serútbúgvin. Tey eru útbúgvin sum sosialráðgevar ella hava aðra útbúgving og upplæring í sosialari umsiting. Tey hava holla vitan og innlit í almannalóggávuna, og tey eru útbúgvin innan ráðgeving og vegleiðing.

 

Mál og málsviðgerð

Flest øll starvsfólkini í Almannaverkinum viðgera mál, t.v.s. at tey eru málsviðgerar.

Eitt mál er t.d. ein umsókn um uppihaldshjálp, barnagjald ella aðra veiting, har ein avgerð verður tikin.

Viðgerðin av einum máli skal fylgja ávísum krøvum, sum fyrisitingarlógin fyriskrivar. Starvsfólkið, ið viðger eitt mál, er sostatt ein myndugleikapersónur, ið hevur skyldu at taka avgerðir um veitingar í samsvari við almannalóggávuna eftir reglum, sum eru ásettar í lógini um almenna fyrisiting. Í hesum er tín rættartrygd.

 

Rættartrygd og tagnarskylda

Tín rættartrygd er at skilja sum tín verja ímóti, at Almannaverkið tekur tilvildarligar avgerðir og ikki fylgir teim reglum, ið eru galdandi fyri viðgerð av málum.

Øll starvsfólk á Almannaverkinum eru bundin av tagnarskyldu.

Vit royna at tryggja okkum, at okkara starvsfólk hava hollan kunnleika og vitan um sosial viðurskifti, lógir og málsviðgerð.

Í øðrum lagi royna vit at upplýsa teg um tín rætt til veitingar, eins og vit kunna teg um rættarreglur, sum galda fyri viðgerðina av tínum máli.

 

Kanningarskylda

Almannaverkið hevur skyldu og ábyrgd av at tryggja sær, at nøktandi upplýsingar eru í einum máli, áðrenn avgerð verður tikin í málinum. Upplýsingar skulu vera álítandi.

Ein umsøkjari skal hoyrast, um hann ikki veit um upplýsingar, sum Almannaverkið hevur fingið frá øðrum myndugleikum.

 

 

 

 



Dagført tann 12-10-2012