Endurgjald fyri goldin barna- og hjúnafelagagjøld

Ein persónur, sum Ríkisumboðið ella samsvarandi útlendskur myndugleiki hevur álagt at gjalda uppihaldspening, kann fáa stuðul til uppihaldspening.

Treytir

Talan skal vera um uppihaldspening til børn undir 18 ár, sum persónurin ikki býr saman við. Eisini kann talan vera um uppihaldspening til hjúnafelaga, ið persónurin er skildur ella sundurlisin frá.

Upphædd

Árliga stuðulsupphæddin er 40% av tí uppihaldspeningi, sum persónurin er álagdur at gjalda. Peningurin skal vera goldin.


Stuðul til uppihaldspening til børn verður tó bert veittur fyri goldnu upphæddina, sum fer upp um vanliga árliga gjaldið fyri eitt barn. Í 2014 er upphæddin 12.996,00 krónur. Stuðul verður sostatt ikki veittur umsøkjara, sum bert rindar vanligt barnagjald til eitt barn.

Útgjald og freistir

Tá søkt verður um stuðul til uppihaldspening eru tvær freistir, sum havast skulu í huga.

1) Freist at lata umsókn inn
Umsóknin skal verða latin inn í seinasta lagi 1. juli fyri uppihaldspening, sum er goldin undanfarna álmanakkaár. Verður umsóknin latin inn seinni, fellur rætturin til stuðul av goldnu upphæddini burtur. Frávik kann ikki gerast frá freistini. Tað er sostatt sera umráðandi, at umsóknin verður latin inn rættstundis.

Dømi:
Gjaldsskyldugi rindar barnagjald sum álagt fyri 2012. Umsóknin fyri goldnu upphæddina skal verða latin inn í seinasta lagi 1. juli 2013. Verður umsóknin til dømis latin inn í august 2013, fellur rætturin til stuðul fyri goldnu upphæddina burtur.

2) Freist í samband við útgjald av stuðli
Stuðul verður goldin út seinast í juni og desember. Lýst verður í bløðunum og á heimasíðuni nær umsóknin skal verða latin inn. Henda freist ávirkar ikki rættin til stuðul, men hevur einans týdning fyri, nær stuðulin verður útgoldin. Verður umsóknin latin inn eftir ásettu freistina, hevur umsøkjarin ikki krav uppá útgjald fyri enn næstu ferð útgjald verður avgreitt.

Dømi:
Næsta útgjald av stuðli til uppihaldspening er desembur 2013. Freistin at søkja um stuðul er 3. desembur. Verður umsókn fyri barnagjald, sum er álagt og goldið í tíðarskeiðinum juli til desembur 2013 til dømis latin inn 10. desembur 2013, hevur umsøkjarin ikki krav uppá at fáa umsóknina avgreidda fyrr enn við næsta útgjald í juni 2014.. Umsøkjarin missir sostatt ikki rættin til stuðulin, men kann rokna við longdari avgreiðslutíð.

Umráðandi er tó, at umsóknin verður latin inn í seinasta lagi 1. juli 2012. Verður umsóknin latin inn eftir hesa freist fellur rætturin til stuðulin burtur. Sum nevnt kann frávik ikki gerast frá freistini.

Umsóknarblað til stuðul til uppihaldspening er at finna undir oyðubløð.

 

 

 

 

 

 



Dagført tann 28-05-2015