Rætt til dagpening til foreldur, ið eru heima hjá sjúkum barni á barnsins fyrsta og øðrum sjúkradegi

Løgtingið hevur 15. mai 2010 samtykt eina broyting í dagpeningalógini, sum inniber, at dagpeningur verður veittur til foreldur, sum eru heima hjá sjúkum barni á barnsins fyrsta og øðrum sjúkradegi. Niðanfyri er stutt lýsing av broytingunum.

Dagpeningur, tá ið barnið er sjúkt

Frá 1. januar 2012 kunnu foreldur, sum eru heima hjá sjúkum barni søkja um dagpening fyri barnsins 1. og 2. sjúkradag.


Treytir fyri at fáa dagpening

Treytin fyri at fáa dagpening er at barnið er undir 14 ár.

Harumframt skal umsøkjarin lúka vanligu treytirnar í dagpeningalógini um rætt til dagpening vegna sjúku. Tað vil siga, at einans umsøkjari, sum hevur tilknýti til arbeiðsmarknaðin, og sum má vera heima frá arbeiði vegna sjúku hjá barni, hevur rætt til dagpening.


Bæði foreldur kunnu verða heima hjá tí sjúka barninum í senn og fáa dagpening, um tey annars lúka treytirnar.

Foreldur, sum sambært sáttmála hava rætt til frí við løn tá ið barn/børn teirra eru sjúk, hava ikki rætt til dagpening fyri barnsins 1. og 2. sjúkradag. Um sáttmálin einans tryggjar rætt til løn við barnsins 1. sjúkradag, kann søkjast um dagpening fyri 2. sjúkradag.


Dagpeningatíðarskeið

Hvørt av foreldrunum kann í mesta lagi fáa dagpening fyri barnsins 1. og 2. sjúkradag í 10 dagar um árið.

Avmarkingin er galdandi uttan mun til tal av børnum. Møguligt er ikki hjá foreldrum at flyta dagar sína millum.


Umsóknarblað

Dagpeningur verður bert veittur eftir umsókn. Umsóknarblað kann heintast her á oyðubløð ella fáast við at venda sær til Almannaverkið.

Arbeiðsgevarin skal á umsóknarblaðnum vátta fráveru og inntøkumiss.


Læknaváttan

Váttan um fráveru frá arbeiðsgevara verður javnsett við læknaváttan, og neyðugt er tí ikki við váttan frá lækna.


Útgjald og fígging

Dagpeningútgjaldið er 100% av inntøkuni, tó í mesta lagi dagpeningahámark, sum er 80% av lønini sambært sáttmála millum Føroya Arbeiðarafelag og Føroya Arbeiðsgevarafelag.


Dagpeningurin verður útgoldin av Almannaverkinum. Arbeiðsgevarin afturrindar landskassanum tær útreiðslur, ið standast av, at Almannaverkið rindar fyri barnsins 1. og 2. sjúkradag. Taks krevur inn peningin frá arbeiðsgevaranum.


Rindar arbeiðsgevarin ístaðin starvsfólkinum løn, tá ið barn/børn teirra eru sjúk, verður dagpeningur ikki útgoldin, og einki krav verður sent arbeiðsgevaranum. Ikki er neyðugt er í hesum føri at lata Almannaverkinum umsókn, og arbeiðsgevaranum nýtist ikki at vátta fráveruna og inntøkumissin.


Arbeiðsgevari, sum velur at rinda løn fyri barnsins 1. og 2. sjúkradag hevur í mesta lagi skyldu at rinda eina upphædd, sum svarar til ta veiting starvsfólkið vildi fingið útgoldið í dagpeningi.




Dagført tann 26-01-2016