Slepp undan harðskapi við ferðsluljósum

Við miðvísum tiltøkum, einfaldum váðagreiningum, námsfrøðiligum amboðum og við at taka borgaran við uppá ráð, hevur tað í Almannaverkinum víst seg gjørligt at minka munandi um – og í nógvum førum heilt – vandan fyri harðskapi

 


Flestu harðskapsstøðurnar og tvístøðurnar koma fyri í nærumhvørvinum og royndirnar vísa at hesar støðurnar kunna sleppast undan.




Á ráðstevnuni "Vit vilja gera mun” hjá Almannaverkinum heldur Julianna Næs Olsen fyrilestur um námsfrøðiliga háttin Ferðsluljós, sum er eitt einfalt amboð at fyribyrgja harðskapi og ósemjum.

Hátturin brúkar reyðu, gulu og grønu litirnar fyri at eyðmerkja støður, har litirnir hjálpa, bæði starvsfólki og borgarum, at vera um hvønn annan.


 Julianna Næs Olsen er eindarleiðari í Eind 5 í Almannaverkinum, sum umfatar børn, ung og vaksin við menningartarni í Suðurstreymi. Hon hevur starvast námsfrøðiliga við fólki við menningartarni tey seinastu 26 árini.

 

Ráðstevnan "Vit vilja gera mun” er í Norðurlandahúsinum fríggjadagin 5. mai millum klokkan 9 og 16. Ráðstevnan er ókeypis og øll eru vælkomin.

 

Almannaverkið